AZAL əməkdaşları üçün Əmək Məcəlləsinə edilmiş dəyişikliklərlə bağlı təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən “Azərbaycan Hava Yolları” Qapalı Səhmdar Cəmiyyətinin (AZAL) əməkdaşları üçün Əmək Məcəlləsinə edilmiş son dəyişikliklərə dair təlim təşkil olunub.

Təlim zamanı iştirakçılara Əmək Məcəlləsinə daxil edilmiş yeni anlayışlar, dəyişiklik edilmiş və əlavə olunmuş normalar barədə ətraflı məlumat verilib. Bildirilib ki, həyata keçirilən islahatlar əmək münasibətlərinin daha çevik və şəffaf tənzimlənməsinə, işçi və işəgötürən hüquqlarının daha aydın müəyyən edilməsinə, habelə müasir əmək bazarının tələblərinə uyğun hüquqi mexanizmlərin formalaşdırılmasına xidmət edir.

Eyni zamanda distant (məsafədən) işin hüquqi əsaslarının dəqiqləşdirilməsi, ailə vəzifələri olan işçilərlə bağlı yeni yanaşmalar, məzuniyyətlərin hesablanması qaydalarında edilən dəyişikliklər və digər yeniliklər barədə iştirakçılara izahat verilib.

Təlimin sonunda mövzularla bağlı iştirakçıları maraqlandıran suallar cavablandırılıb, qarşılıqlı fikir mübadiləsi aparılıb.