Bakıda əmək münasibətləri və əməyin mühafizəsinə dair maarifləndirmə tədbiri keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən Bakıda işəgötürənlər üçün “Uşaqların əmək hüquqları, məcburi əmək və insan alverinin qarşısının alınması” və “İş yerlərində əməyin mühafizəsi” mövzularında maarifləndirmə tədbiri təşkil olunub.

Tədbirdə dövlət və özəl sektoru təmsil edən müəssisə və təşkilatların 40-a yaxın nümayəndəsi iştirak edib.

Görüş zamanı uşaq əməyinin istismarına qarşı mübarizənin əhəmiyyətindən, uşaqların əmək hüquqlarının qorunması istiqamətində həyata keçirilən tədbirlərdən, eləcə də məcburi əmək və insan alverinin qarşısının alınmasında qurumlararası əməkdaşlığın vacibliyindən bəhs olunub.

Bununla yanaşı, Əməyin Mühafizəsi Mərkəzinin fəaliyyət istiqamətləri və bu sahədə görülən işlər barədə məlumat verilib, müəssisələrdə əməyin mühafizəsi üzrə norma və standartların tətbiqinə göstərilən dəstək, habelə yeni qəbul edilmiş tələblər iştirakçıların diqqətinə çatdırılıb.

Tədbirin sonunda iştirakçıları maraqlandıran suallar cavablandırılıb, qarşılıqlı fikir mübadiləsi aparılıb.