Bakıda işəgötürənlər qeyri-formal məşğulluq və əməyin mühafizəsinə dair məlumatlandırılıb

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Bakı Şəhər İdarəsi tərəfindən işəgötürənlər üçün maarifləndirmə tədbiri təşkil olunub.

Tədbir “Qeyri-formal məşğulluğun qarşısının alınması” və “İş yerlərində əməyin mühafizəsi” mövzularına həsr edilib.

Görüşdə Bakı şəhəri üzrə müxtəlif müəssisə və təşkilatların nümayəndələri, işəgötürənlər və onların səlahiyyətli nümayəndələri iştirak ediblər.

Maarifləndirmə tədbiri zamanı Dövlət Əmək Müfəttişliyi Xidmətinin əmək qanunvericiliyinin tələblərinin izahı, bu tələblərə əməl olunmasının əhəmiyyəti, eləcə də təhlükəsiz və sağlam əmək şəraitinin təmin edilməsinin işəgötürənlərin əsas vəzifələrindən biri olduğu vurğulanıb.

Tədbirdə çıxış edən Əməyin Mühafizəsi Mərkəzinin fəaliyyət istiqamətləri, əməyin mühafizəsi sahəsində görülən işlər, müəssisələrdə müvafiq standart, norma və qaydaların tətbiqinə göstərilən metodiki dəstək barədə ətraflı məlumat verib. Eyni zamanda, əməyin mühafizəsi sahəsində yeni qəbul edilmiş dövlət standartları iştirakçıların diqqətinə çatdırılıb.

Bundan əlavə, Azərbaycan Həmkarlar İttifaqları Konfederasiyasının və Azərbaycan Sahibkarlar (İşəgötürənlər) Təşkilatları Milli Konfederasiyasının nümayəndələri qeyri-formal məşğulluğun əmək bazarında yaratdığı risklər, bu halların qarşısının alınmasının sosial və iqtisadi əhəmiyyəti, habelə sosial tərəfdaşlıq çərçivəsində görülən tədbirlər barədə çıxış ediblər.

Tədbir çərçivəsində həmçinin Dünya Bankı Qrupunun “Business Ready” reytinq hesabatı barədə məlumat verilib, bu kontekstdə Azərbaycanda biznes mühitinin daha da yaxşılaşdırılması, əmək qanunvericiliyi və əmək inzibatçılığı sahəsində həyata keçirilən islahatlara dair təqdimatlar nümayiş etdirilib.

Sonda mövzularla bağlı iştirakçıları maraqlandıran suallar cavablandırılıb, qarşılıqlı fikir mübadiləsi aparılıb.