Bərdədə əmək qanunvericiliyi və əməyin mühafizəsinə dair maarifləndirmə tədbiri keçirilib

Əmək və Əhalinin Sosial Müdafiəsi Nazirliyi və Nazirlik yanında Dövlət Əmək Müfəttişliyi Xidməti tərəfindən Bərdə şəhərində maarifləndirmə tədbiri təşkil olunub. Tədbir “Əmək və icra intizamının təmin edilməsi qaydaları”, “İş yerlərində əməyin mühafizəsi” və “Əmək qanunvericiliyinə edilmiş son dəyişikliklər” mövzularına həsr edilib.

Tədbirdə Nazirliyin, Xidmətin Qarabağ regional şöbəsinin əməkdaşları, həmçinin dövlət və özəl sektoru təmsil edən 80 nəfər iştirak edib.

Çıxışlar zamanı iş yerlərində əmək və icra intizamının təmin edilməsi qaydaları, əməyin mühafizəsinin təşkili və bu sahədə qanunvericiliyin tələbləri barədə məlumat verilib.

Bununla yanaşı, “Qanunu bil, həyatı asanlaşdır” şüarı altında əmək qanunvericiliyinə edilmiş son dəyişikliklər iştirakçıların diqqətinə çatdırılıb. Bildirilib ki, həyata keçirilən islahatlar çərçivəsində bir sıra normativ hüquqi aktlarda ümumilikdə 400-dən çox dəyişiklik edilib. Qeyd olunub ki, qəbul edilən dəyişikliklərin əsas məqsədi əmək münasibətlərinin daha da təkmilləşdirilməsi, işçi və işəgötürən hüquqlarının daha effektiv müdafiəsinin təmin edilməsi, həmçinin əmək bazarında şəffaflığın artırılmasıdır.

Eyni zamanda, dəyişikliklərin tətbiq mexanizmləri və praktiki icrası izah olunub, iştirakçıları maraqlandıran və ən çox sual doğuran məsələlər ətraflı şərh edilib, normativ tələblərin düzgün tətbiqi ilə bağlı müvafiq izahatlar verilib.

Tədbirin sonunda iştirakçıların sualları cavablandırılıb, mövzu ətrafında fikir mübadiləsi aparılıb.