DƏMX-də Özbəkistanın “Əmək üzrə vahid milli sistemi”nin texniki-proqram kompleksinin direktoru ilə görüş keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətində (DƏMX) Özbəkistan Respublikasının “Əmək üzrə vahid milli sistemi”nin texniki-proqram kompleksinin direktoru Sardor Taciboyev ilə görüş keçirilib.

Görüşün məqsədi əmək münasibətlərinin rəqəmsallaşdırılması sahəsində iki ölkə arasında təcrübə mübadiləsinin aparılması, əmək münasibətlərinin idarə olunmasında texnoloji həllərin tətbiqi və əmək müfəttişliklərinin funksional rolu barədə fikir mübadiləsindən ibarət olub.

Görüş zamanı Sardor Taciboyev rəhbərlik etdiyi “Əmək üzrə vahid milli sistem”in strukturu, məqsədləri və texniki imkanları haqqında ətraflı məlumat verib. O, sistemin işəgötürən və işçi münasibətlərinin rəqəmsal əsasda izlənməsi, əmək müqavilələrinin qeydiyyatı və şəffaflığın təmin olunmasındakı əhəmiyyəti vurğulayıb.

Xidmətin nümayəndələri Azərbaycanda əmək münasibətlərinin rəqəmsallaşdırılması istiqamətində həyata keçirilən islahatlar, ƏMAS sistemi və e-sosial.az platformasının funksionallığı barədə qarşı tərəfi məlumatlandırıblar.

Tərəflər əmək sahəsində rəqəmsallaşma üzrə əməkdaşlığın davam etdirilməsi və gələcəkdə təcrübə mübadiləsinin genişləndirilməsi barədə razılığa gəliblər.