DƏMX-in nümayəndə heyəti Türkiyədə dünyanın ən qabaqcıl texnologiya mərkəzində olub

Türkiyə Respublikasının Əmək və Sosial Müdafiə Nazirliyinin Əməyin Mühafizəsi və Təhlükəsizliyi Baş İdarəsi rəhbərliyinin dəvəti ilə Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəis müavini Azər Rəhimovun başçılıq etdiyi nümayəndə heyəti Türkiyədə səfərdə olub.

Səfər çərçivəsində nümayəndə heyəti üçün Türkiyə Metal Sənayeçiləri Birliyi tərəfindən yaradılan MEXT Texnologiya Mərkəzinə infotur təşkil edilib. Nümayəndələr əməyin mühafizəsi sahəsində tətbiq olunan müasir texnologiyalar və iş prosesləri ilə yerində tanış olublar.

İnfoturda dünyanın ən qabaqcıl və əhatəli rəqəmsal transformasiya və bacarıq mərkəzlərindən biri hesab olunan MEXT Texnologiya Mərkəzinin fəaliyyəti yaxından izlənilib. Nümayəndələrə məhsuldarlığın və səmərəliliyin artırılması, israfın minimuma endirilməsi, iş yerlərində sağlam və təhlükəsiz əmək şəraitinin yaradılması məqsədilə tətbiq edilən yeni istehsal modelləri, yaşıl və rəqəmsal transformasiyanı əhatə edən “əkiz transformasiya” prosesləri, texnologiya vasitəsilə uzaqdan idarəetmə sistemləri və ixtisaslaşdırılmış modellər barədə ətraflı məlumat verilib.

Sonda qurumlar arasında əməkdaşlıq perspektivləri müzakirə edilib və təcrübə mübadiləsi aparılıb.