Dövlət Əmək Müfəttişliyi Xidməti Tovuzda işəgötürənlər üçün maarifləndirmə tədbiri keçirib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti işəgötürənlər üçün Tovuzda "Əmək müqaviləsinə xitam verilməsinin əsasları və qaydaları" və “İş yerlərində əməyin mühafizəsi” mövzularında maarifləndirmə tədbiri keçirib.

Görüşdə 200 nəfər iştirak edib.

Tədbirin açılış nitqini Xidmətin Qazax-Tovuz regional şöbəsinin rəis müavini Anar Qocayev söyləyib. O, Dövlət Əmək Müfəttişliyi Xidməti tərəfindən mütəmadi olaraq təşkil edilən maarifləndirmə tədbirlərinin əhəmiyyətindən bəhs edib, əmək qanunvericiliyinin tələblərinə əməl olunmasının vacibliyini vurğulayıb və müzakirə edilən mövzuların aktuallığını tədbir iştirakçılarının diqqətinə çatdırıb.

Daha sonra regional şöbənin əməkdaşları Məhəmmədəli Cəfərov "Əmək müqaviləsinə xitam verilməsinin əsasları və qaydaları", Ruslan Hüseynov isə “İş yerlərində əməyin mühafizəsi” mövzusunda təqdimatlarla çıxış ediblər. Tədbir iştirakçılarına müəssisə və təşkilatlarda əmək müqaviləsinə xitam verilməsinin əsasları qanunvericiliyin tələblərinə uyğun olaraq izah edilib. Eyni zamanda təhlükəsiz və sağlam iş şəraitinin təmin edilməsi, əməyin mühafizəsi üzrə mütəxəssislərin bilik və bacarıqları, eləcə də iş yerlərində təhlükəsiz əmək mədəniyyətinin təkmilləşdirilməsi istiqamətində dövlət nəzarətinin rolu müzakirə edilib.

Tədbirdə həmçinin Nazirliyin digər qurumlarının nümayəndələri və sosial tərafdaşlar da iştirak ediblər.

Sonda müzakirə olunan mövzularla bağlı iştirakçıların sualları cavablandırılıb.