Əmək hüququ, əməyin mühafizəsi və təhlükəsizlik texnikası qaydalarına riayət edilməsi mövzusunda seminar keçirilib

28 Aprel – Ümumdünya Əməyin Mühafizəsi Günü münasibətilə Şəki şəhərində “Əmək hüququ, əməyin mühafizəsi və təhlükəsizlik texnikası qaydalarına riayət edilməsi" mövzusunda seminar təşkil edilib.

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti və Azərbaycan Həmkarlar İttifaqları Konfederasiyasının birgə təşkilatçılığı və Şəki Şəhər İcra Hakimiyyətinin dəstəyi ilə keçirilən tədbirə 60-dan çox iştirakçı qatılıb.

Seminarda Azərbaycan Dövlət İdarələri və İctimai Xidmət İşçiləri Həmkarlar İttifaqı Respublika Birliyinin nümayəndələri iştirak edərək mövzu üzrə çıxışları dinləyib, eyni zamanda qısametrajlı film izləyiblər.

Çıxışlar zamanı 28 Aprel – Ümumdünya Əməyin Mühafizəsi Gününün tarixi barədə məlumat verilib, həmçinin əməyin mühafizəsi sahəsində qüvvədə olan qanunvericiliyin tələbləri iştirakçıların diqqətinə çatdırılıb.

Bildirilib ki, bu kimi görüşlərin təşkilində əsas məqsəd işçilərin həyat və sağlamlığının qorunması üçün təhlükəsiz əmək şəraitinin yaradılması, istehsalat qəzalarının qarşısının alınması üçün profilaktik tədbirlərin görülməsi məsələsinə ictimaiyyətin diqqətinin artırılmasıdır. Həmçinin işçi və işəgötrənlərin birgə məsuliyyət və qarşılıqlı etimadına əsaslanan əməyin mühafizəsi mədəniyyətinin sağlam əmək bazarının və layiqli əməyin təməli olduğu vurğulanıb. Əmək münasibətləri iştirakçısı olan hər bir fərdin qanunvericiliyin tələblərini bilməsi və əməl etməsi istiqamətində müvafiq dövlət qurumlarının maarifləndirmə işinin əhəmiyyəti barədə geniş müzakirə aparılıb.

Tədbirin sonunda iştirakçıların sualları cavablandırılıb.