Əmək münasibətləri, əməyin mühafizəsi və insan resursları mövzusunda konfrans keçirilib

Azərbaycan-Türkiyə İş Adamları Birliyinin təşkilatçılığı ilə Bakıda “Əmək münasibətləri, əməyin mühafizəsi və insan resursları ekoloji, sosial və korporativ idarəetmə yanaşmasının (ESG) əsas istiqamətlərindən biri kimi” mövzusunda konfrans keçirilib. 

Tədbirdə dövlət qurumlarının rəhbər vəzifəli şəxsləri, millət vəkilləri, Türkiyə Respublikasının ölkəmizdəki səfirliyinin müşavirləri, dövlət qurumları və qeyri-hökumət təşkilatlarının nümayəndələri, kütləvi informasiya vasitələrinin təmsilçiləri və iş adamları iştirak edib.
Konfransda seçilən mövzunun sahibkarlar üçün əhəmiyyətindən danışılıb, ölkə başçısının növbəti onillik üçün qarşıya qoyduğu “Rəqabətli insan kapitalı” Milli Prioritetinə çatmaq üçün bu növ tədbirlərin vaxtaşırı təşkil edilməsinin önəmi vurğulanıb.

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəis müavini Nərmin Mirzəyeva Əmək Məcəlləsinə edilmiş dəyişikliklər və Əmək və Məşğulluq Alt Sisteminin (ƏMAS) funksionallığının genişləndirilməsi barədə məlumat verib. Rəis müavini ƏMAS-ın inkişafı işçi və işəgötürən arasında effektiv kommunikasiya platformasının formalaşmasına, kadr kargüzarlığının rəqəmsallaşdırılmasına və məlumat mübadiləsinin avtomatlaşdırılmasına səbəb olduğunu bildirib. Onun sözlərinə görə, bu yeniliklər işəgötürənlər üçün bürokratik yükü azaldır, işçilər üçün isə prosedurları sadələşdirir. Sənədlərin kağız formadan elektron formaya keçidinin ətraf mühitin qorunmasında müsbət təsirləri qeyd olunub. 

Xidmətin cari ildə fəaliyyətinin, gördüyü işlərin 20 beynəlxalq mükafata layiq görüldüyü diqqətə çatdırılıb. N.Mirzəyeva həmçinin, Əməyin Mühafizəsi Mərkəzi və Mərkəzin gördüyü işlər barədə geniş məlumat verib. 
Nazirlik tabeliyində Dövlət Məşğulluq Agentliyinin İdarə Heyətinin sədr müavini Hasil Abbasov, Əmək Bazarı və Sosial Müdafiə Məsələləri üzrə Milli Observatoriyanın İdarə Heyətinin sədr müavini Elçin Süleymanov da çıxış ediblər. 
Dövlət Əmək Müfəttişliyi Xidməti və Milli Observatoriyanın birgə layihəsi olan “DOST Müfəttiş” layihəsi barədə təqdimat edilib. 

Tədbirin sonunda iştirakçıların mövzu ilə bağlı sualları cavablandırılıb.