Əməyin Mühafizəsi Mərkəzinin Naxçıvan filialı tərəfindən növbəti maarifləndirici təlim keçirilib

Naxçıvan Muxtar Respublikasında  “İş yerlərində əməyin mühafizəsi, texniki təhlükəsizlik və iş yerlərinin attestasiyası və icbari sığorta” mövzusunda maarifləndirici təlim keçirilib.

Təlim Naxçıvan Muxtar Respublikasının Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti və Əməyin Mühafizəsi Mərkəzinin Naxçıvan filialının birgə təşkilatçılığı ilə Naxçıvan Avtomobil Yolları Dövlət Agentliyinin əməkdaşları üçün keçirilib.

Maarifləndirici görüşdə Xidmətin və Mərkəzin əməkdaşları təqdimatlarla çıxış edərək iştirakçılara işçilərin əməyinin mühafizəsi, onlar üçün sağlam və təhlükəsiz əmək şəraitinin yaradılması ilə bağlı ətraflı məlumat veriblər.

Təlimdə həmçinin müəssisələrdə əməyin mühafizəsi üzrə standart, norma və qaydaların tətbiqi, Əməyin Mühafizəsi Mərkəzinin fəaliyyət istiqamətləri ilə bağlı məlumatlar iştirakçıların diqqətinə çatdırılıb.

Maarifləndirici təlimdə 25 nümayəndə iştirak edib. Görüş çərçivəsində iştirakçıların mövzu ilə bağlı sualları cavablandırılıb.