İş yerlərində gender bərabərliyinin təşviqinə həsr olunan tədbir keçirilib

Azərbaycan Həmkarlar İttifaqları Konfederasiyasında “İş yerlərində gender bərabərliyinin təşviqi” mövzusunda tədbir təşkil olunub.

Tədbirdə çıxış edən AHİK sədrinin müavini Musa Mirzəyev ölkəmizdə insan hüquq və azadlıqlarının təmin olunması, gender bərabərliyinin təşviqi və qadınların cəmiyyətdə rolunun gücləndirilməsi istiqamətində görülən işlərdən bəhs edib. O, Azərbaycan qadınının ictimai nüfuzunun yüksəldilməsində Birinci vitse-prezident Mehriban Əliyevanın xüsusi xidmətlərini vurğulayıb.

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəis müavini Nərmin Mirzəyeva çıxışında iş yerində gender bərabərliyinin sağlam və ədalətli əmək mühitinin formalaşdırılması baxımından vacibliyini qeyd edib. O, son illərdə qadınların əmək bazarında iştirakının artırılması və əmək münasibətlərində ayrı-seçkiliyin qarşısının alınması istiqamətində mühüm islahatların aparıldığını bildirib. Xidmətin bu sahədə maarifləndirmə tədbirlərini və qanunvericiliyin tələblərinə əməl olunmasına nəzarəti davam etdirdiyi diqqətə çatdırılıb.

Ailə, Qadın və Uşaq Problemləri üzrə Dövlət Komitəsinin Aparat rəhbəri Ceyran Rəhmətullayeva, Dövlət İdarələri və İctimai Xidmət İşçiləri Həmkarlar İttifaqı Respublika Birliyinin sədri Hikmət Nəbiyev, Fövqəladə Hallar Nazirliyi İşçilərinin Həmkarlar İttifaqı Respublika Komitəsinin sədri Mehman İsmayılov və Azərbaycan Əmək və Sosial Münasibətlər Akademiyasının rektoru vəzifələrini icra edən Fərid Babayev çıxışlarında gender siyasəti, qadınların sosial-iqtisadi həyatda fəal iştirakı və bu istiqamətdə yaradılan imkanlar barədə fikirlərini bölüşüblər.

Tədbirə onlayn formatda qoşulan BƏT-in gender məsələləri üzrə mütəxəssisi Özgə Bərbər Agtaş gender bərabərliyinin inklüziv və dayanıqlı əmək münasibətlərinin formalaşmasındakı əhəmiyyətindən danışıb, Azərbaycanda bu sahədə görülən işləri qeyd edib.

Sonda “Gender bərabərliyi: ailə, əmək bazarı və milli inkişafın strateji gündəliyi” mövzusunda təqdimat edilib və mövzu ətrafında fikir mübadiləsi aparılıb.