Lənkəran Şəhər Mədəniyyət Mərkəzində işəgötürənlər üçün əmək münasibətlərində gender bərabərliyi, “ƏMAS-ın imkanları” və “İş yerlərində əməyin mühafizəsi” mövzularında maarifləndirmə tədbiri keçirilib.
Tədbir Əmək və Əhalinin Sosial Müdafiəsi Nazirliyinin, Nazirlik yanında Dövlət Əmək Müfəttişliyi Xidmətinin və Nazirliyin tabeliyində Dövlət Məşğulluq Agentliyinin birgə təşkilatçılığı ilə ölkənin 14 iqtisadi rayonunu əhatə edən “Əmək münasibətlərində gender bərabərliyi – bərabər hüquqlar, bərabər imkanlar” kampaniyası çərçivəsində keçirilib.
Tədbirdə Nazirliyin və onun tabeliyindəki qurumların nümayəndələri, eləcə də dövlət və özəl sektoru təmsil edən 60 müəssisə, idarə və təşkilatın 110 nümayəndəsi iştirak edib. İştirakçıların müəyyənləşdirilməsi zamanı “Əmək və məşğulluq” altsistemində (ƏMAS) aparılmış təhlillər əsasında qadınların nisbətən az təmsil olunduğu iqtisadi fəaliyyət sahələrində çalışan müəssisələrə xüsusi diqqət yetirilib.
Tədbir çərçivəsində əmək qanunvericiliyi sahəsində son illərdə həyata keçirilmiş islahatlar, Əmək Məcəlləsində nəzərdə tutulan güzəştlər, imtiyazlar və əlavə təminatlar, Dövlət Məşğulluq Agentliyinin işəgötürənlərə təqdim etdiyi xidmətlər, habelə Azərbaycanın Bərabər əməkhaqqı üzrə Beynəlxalq Koalisiyaya (EPIC) qoşulması ilə bağlı görülmüş işlər barədə məlumat verilib.
Həmçinin iştirakçılara ƏMAS-ın imkanları, o cümlədən əmək müqavilələrinin elektron formada bağlanması, əmək müqaviləsi bildirişlərinin sistemə vaxtında daxil edilməsi, eləcə də işçilərin öz əmək müqavilələri və əmək fəaliyyəti barədə məlumatları sistem vasitəsilə əldə etməsi barədə ətraflı izahat verilib. Əmək münasibətlərinin ƏMAS vasitəsilə rəsmiləşdirilməsinin həm işçilərin hüquqlarının qorunması, həm də işəgötürənlərin fəaliyyətində şəffaflığın təmin edilməsi baxımından əhəmiyyəti vurğulanıb.
Əməyin mühafizəsi mövzusu üzrə isə bu sahədə qanunvericiliyin tələbləri, Əməyin Mühafizəsi Mərkəzinin fəaliyyəti, əməyin mühafizəsi normaları, qaydaları və prinsipləri, iş yerlərinin attestasiyasının keçirilməsi qaydaları və dövlət standartları barədə iştirakçılara ətraflı izahat verilib.
Sonda tədbir iştirakçılarının sualları cavablandırılıb.