Maarifləndirmə tədbiri bu dəfə Bakı şəhəri 129 nömrəli tam orta məktəbdə keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyində Əməyin Mühafizəsi Mərkəzi tərəfindən ümumi təhsil müəssisələrində maarifləndirmə tədbirləri davam edir.

Bakı şəhərində yerləşən 129 nömrəli tam orta məktəbdə keçirilən növbəti maarifləndirmə tədbirində 30 məktəbli iştirak edib.

Tədbir çərçivəsində iştirakçılara əməyin mühafizəsinin əhəmiyyəti, təhlükəsizlik və yanğın təhlükəsizliyi qaydaları, həmçinin əmək fəaliyyəti zamanı hüquq və vəzifələr barədə ətraflı məlumat verilib. Eyni zamanda yeni qəbul olunmuş standartlar və “Vision Zero” (“Sıfır Gözlənti”) yanaşmasına əsaslanan təhlükəsiz əmək mədəniyyətinin təşviqi məsələləri diqqətə çatdırılıb.

Tədbir interaktiv formatda keçirilib, iştirakçıları maraqlandıran suallar cavablandırılıb və mövzular üzrə fikir mübadiləsi aparılıb.