Mədəniyyət İşçiləri Həmkarlar İttifaqının 120 illik yubileyi qeyd edilib

Azərbaycan Həmkarlar İttifaqları Konfederasiyasının (AHİK) üzv təşkilatı olan Mədəniyyət İşçiləri Həmkarlar İttifaqının (MİHİ) yaradılmasının 120 illik yubileyinə həsr olunmuş “Həmkarlarla 120 il” tədbiri keçirilib. Tədbirdə ölkənin əmək, mədəniyyət və sosial sahələrində fəaliyyət göstərən qurumların nümayəndələri, həmçinin beynəlxalq qonaqlar iştirak ediblər.

AHİK sədri Sahib Məmmədov çıxışında həmkarlar ittifaqlarının tarixi inkişaf yolundan və ölkənin ictimai həyatında rolundan danışıb. O, dövlətin mədəniyyət, elm, təhsil və idman sahələrinə göstərdiyi dəstəyin Ulu Öndər Heydər Əliyev tərəfindən formalaşdırıldığını və Prezident İlham Əliyev tərəfindən uğurla davam etdirildiyini qeyd edib.

Konfederasiya tərəfindən əmək hüquqlarının müdafiəsi, layiqli əmək şəraitinin təmin olunması, üzvlərin sağlamlığı, istirahəti və rifahının yaxşılaşdırılması istiqamətində həyata keçirilən layihələr barədə məlumat verilib.

Mədəniyyət nazirinin müavini Fərid Cəfərov həmkarlar ittifaqlarının fəaliyyətini yüksək qiymətləndirərək, mədəniyyət, media və idman sahəsində çalışan əməkdaşların hüquqlarının qorunmasında MİHİ-nin rolunu vurğulayıb. Milli Məclisin sədr müavini Rafael Hüseynov, Əmək və sosial siyasət komitəsinin sədri Musa Quliyev, İnsan hüquqları komitəsinin sədri Zahid Oruc və Xalq yazıçısı Çingiz Abdullayev çıxışlarında mədəniyyət işçilərinin ölkənin inkişafında mühüm rolunu diqqətə çatdırıblar.

Dövlət Əmək Müfəttişliyi Xidmətinin rəis müavini Nərmin Mirzəyeva əmək münasibətlərinin tənzimlənməsində yeniliklər, yeni qanunvericilik aktları və rəqəmsal həllər barədə təqdimatla çıxış edib. O, “Əmək və Məşğulluq” altsisteminin əhəmiyyətini, proaktiv nəzarət, elektron audit və risk modelinin tətbiqi ilə bağlı məlumat verib.

Tədbirdə Qazaxıstan və Özbəkistan həmkar ittifaqlarının nümayəndələri də iştirak edərək əmək münasibətlərinin inkişafında beynəlxalq əməkdaşlığın önəmini vurğulayıblar.

Yubiley çərçivəsində AHİK və MİHİ tərəfindən həyata keçirilən layihələri əks etdirən videotəqdimatlar nümayiş olunub, mədəniyyət və incəsənət nümayəndələrinin iştirakı ilə bədii hissə təşkil edilib.

Tədbirin davamında sosial dialoqun inkişafına həsr olunmuş iki panel müzakirəsi keçirilib. Dövlət qurumları, həmkarlar ittifaqları və özəl sektorun təmsilçiləri əmək bazarının aktual məsələlərini, sosial tərəfdaşlıq imkanlarını və işçi rifahının artırılması yollarını müzakirə ediblər.

“Həmkarlarla 120 il” yubiley tədbiri MİHİ-nin ölkənin mədəni həyatında, işçi hüquqlarının müdafiəsində və həmkar həmrəyliyinin gücləndirilməsində mühüm rolunu bir daha təsdiqləyib. Qeyd edilib ki, təşkilatın əsası 1905-ci ildə “Çapçılar İttifaqı” kimi qoyulub və bu gün mədəniyyət, incəsənət, media və idman sahəsində çalışan əməkdaşların sosial-iqtisadi hüquqlarının müdafiəsində 120 illik zəngin təcrübəyə malikdir.