Naxçıvandakı təhsil müəssisələrində əməyin mühafizəsinə dair maarifləndirmə təlimləri davam edir

Naxçıvanda “Əməyin mühafizəsinə dair ümumi tələblər, yanğın təhlükəsizliyi və ilk yardım qaydaları” mövzusunda növbəti maarifləndirici təlim təşkil olunub.

Təlim Naxçıvan şəhər 2 nömrəli tam orta məktəbdə keçirilib və pedaqoji heyət, eləcə də şagirdlərdən ibarət olmaqla ümumilikdə 71 nəfər iştirak edib.

Əməyin Mühafizəsi Mərkəzinin Naxçıvan filialı və “Naxçıvan Təlim Mərkəzi” publik hüquqi şəxs tərəfindən birgə təşkil edilən tədbirdə əməyin mühafizəsi üzrə ümumi tələblər, sağlam və təhlükəsiz əmək şəraitinin yaradılması, müəssisələrdə müvafiq norma və qaydaların tətbiqi, həmçinin yeni qəbul edilmiş standartlar barədə ətraflı məlumat verilib. Bununla yanaşı, Əməyin Mühafizəsi Mərkəzinin fəaliyyət istiqamətləri iştirakçıların diqqətinə çatdırılıb.

Təlimin sonunda iştirakçıları maraqlandıran suallar cavablandırılıb, mövzu ətrafında fikir mübadiləsi aparılıb.