Peşə məktəbində əməyin təhlükəsizliyi mövzusunda təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyindəki Əməyin Mühafizəsi Mərkəzi İctimai İaşə və Xidmət üzrə Bakı Dövlət Peşə Təhsil Mərkəzinin müəllim və tələbələrinə əməyin təhlükəsizliyi ilə bağlı təlim keçirib.
Təlimin əsas məqsədi müxtəlif peşələr üzrə təhsil alan tələbələrin bu sahədə bilik və bacarıqlarının artırılması və əməyin mühafizəsi sahəsində məlumatlı kadrlar yetişdirməklə əmək şəraitinin inkişafına dəstək verməkdən ibarətdir.
Görüşdə Azərbaycan Həmkarlar İttifaqları Konfederasiyasının və Əməyin Mühafizəsi Mərkəzinin nümayəndələri təqdimatla çıxış ediblər. 
İştirakçılara əməyin təhlükəsizliyi üzrə qanunvericiliyin tələbləri izah edilib, istehsalat qəzaları zamanı ilkin yardım, yanğın təhlükəsizliyi və digər mövzular barədə ətraflı məlumatlar verilib.
Sonda iştirakçıları maraqlandıran suallara aydınlıq gətirilib.