Respublika Sanitariya-Karantin Mərkəzində əməyin mühafizəsinə dair maarifləndirici təlim keçirilib

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin tabeliyində fəaliyyət göstərən Əməyin Mühafizəsi Mərkəzi tərəfindən növbəti maarifləndirici təlim Respublika Sanitariya-Karantin Mərkəzinin əməkdaşları üçün təşkil edilib.

Əməyin mühafizəsi və təhlükəsiz əmək şəraitinin təmin olunmasına həsr olunmuş təlimdə müəssisənin 20-yə yaxın əməkdaşı iştirak edib. Təlimdə Əməyin Mühafizəsi Mərkəzinin mütəxəssisləri tərəfindən əməyin mühafizəsi sahəsində qəbul edilmiş yeni dövlət standartları, onların tətbiqi mexanizmləri, müəssisələrdə təhlükəsizlik mədəniyyətinin formalaşdırılması, habelə risklərin müəyyən edilməsi və idarə olunması ilə bağlı əsas məsələlər ətraflı şəkildə izah edilib.

Bununla yanaşı, istehsalat qəzalarının qarşısının alınması, profilaktik tədbirlərin gücləndirilməsi, işçilərin bilik və bacarıqlarının artırılması, eləcə də təhlükəsiz əmək vərdişlərinin təşviqi təlimin əsas müzakirə mövzuları sırasında yer alıb.

Qeyd edək ki, təlimin əsas məqsədi işəgötürənlərə və işçilərə əməyin mühafizəsi sahəsində mövcud qanunvericiliyin tələblərini çatdırmaq, layiqli və təhlükəsiz əmək şəraitinin yaradılmasına dəstək vermək, eyni zamanda istehsalatda bədbəxt hadisələrin və peşə xəstəliklərinin qarşısının alınması istiqamətində əməyin mühafizəsi üzrə mütəxəssislərin hazırlıq səviyyəsini gücləndirməkdən ibarətdir.