Rusiya nümayəndə heyəti əmək və məşğulluq sahəsində reallaşan elektron xidmətlərlə tanış olub

Rusiyanın Federal Əmək və Məşğulluq Xidmətinin (Rostrud) rəhbəri Mixail İvankovun rəhbərlik etdiyi nümayəndə heyəti 5 saylı Bakı DOST Mərkəzində görüş olub.

Qonaqlar əvvəlcə mərkəzdə əhaliyə göstərilən xidmətlərlə tanış olublar. Daha sonra onlar üçün DOST konsepsiyası, Dövlət Əmək Müfəttişliyi Xidməti, Dövlət Məşğulluq Agentliyi, həmçinin Əmək və Əhalinin Sosial Müdafiəsi Nazirliyinin DOST Rəqəmsal İnnovasiyalar Mərkəzi vasitəsi ilə reallaşdırılan elektron xidmətlərinə dair təqdimatlar edilib.

Dövlət Əmək Müfəttişliyi Xidmətinin rəisi Vəli Quliyevin də iştirkı ilə baş tutan görüşdə qonaqlara əmək münasibətlərinin elektronlaşması fonunda şəffaf əmək bazarının formalaşması istiqamətində görülən işlər barədə ətraflı məlumat verilib. Qanunvericiliyə edilmiş son dəyişikliklərə əsasən əmək müqavilələrinin elektronlaşması ilə işçi və işəgötürən arasında formalaşan əmək münasibətlərinin real vaxt rejimində tənzimlənməsinə xüsusi diqqət çəkilib.  

DOST Agentliyinin İdarə Heyətinin sədri Fərid Məmmədov Prezident İlham Əliyevin 2018-ci il 9 avqust tarixli Fərmanı ilə yaradılan DOST Agentliyinin və DOST mərkəzlərinin dövlət sosial xidmətləri sisteminə gətirdiyi yenilikləri diqqətə çatdırıb. Qeyd olunub ki, Birinci vitse-prezident Mehriban xanım Əliyevanın təşəbbüsü olan DOST konsepsiyası əsasında sosial sahələr üzrə 160 xidmət “bir pəncərə”dən, operativ, şəffaf, vətəndaş rahatlığı və məmnunluğuna uyğun təqdim olunur.

Görüşdə gələcək əməkdaşlıq perspektivləri müzakirə edilib, ikitərəfli maraq doğuran məsələlər ətrafında fikir mübadiləsi aparılıb.