Şəki şəhərində əmək qanunvericiliyinə edilmiş son dəyişikliklərlə bağlı maarifləndirmə tədbiri keçirilib

Əmək və Əhalinin Sosial Müdafiəsi Nazirliyi və Nazirlik yanında Dövlət Əmək Müfəttişliyi Xidməti tərəfindən Şəki şəhərində maarifləndirmə tədbiri təşkil olunub. Tədbir “Əmək qanunvericiliyinə edilmiş son dəyişikliklər” mövzusuna həsr edilib.

Tədbirdə Nazirliyin, Xidmətin Şəki-Zaqatala regional şöbəsinin əməkdaşları, həmçinin dövlət və özəl sektoru təmsil edən 60-dan çox şəxs iştirak edib.

Tədbir çərçivəsində “Qanunu bil, həyatı asanlaşdır” şüarı altında əmək qanunvericiliyinə edilmiş son dəyişikliklər barədə ətraflı məlumat verilib. Bildirilib ki, həyata keçirilən islahatlar çərçivəsində bir sıra normativ hüquqi aktlarda ümumilikdə 400-dən çox dəyişiklik edilib. Qeyd olunub ki, qəbul edilmiş dəyişikliklərin əsas məqsədi əmək münasibətlərinin daha da təkmilləşdirilməsi, işçi və işəgötürən hüquqlarının daha effektiv müdafiəsinin təmin edilməsi, habelə əmək bazarında şəffaflığın artırılmasıdır.

Eyni zamanda, dəyişikliklərin tətbiq mexanizmləri və praktik icrası izah olunub, iştirakçıları maraqlandıran və ən çox sual doğuran məsələlər ətraflı şərh edilib, normativ tələblərin düzgün tətbiqi ilə bağlı müvafiq izahatlar verilib.

Tədbirin sonunda iştirakçıların sualları cavablandırılıb, mövzu ətrafında fikir mübadiləsi aparılıb.