Tacikistanın əmək, miqrasiya və məşğulluq nazirinin müavini Kiyomiddin Davlatzodanın başçılıq etdiyi nümayəndə heyəti ilə görüş keçirilib

Əmək və Əhalinin Sosial Müdafiəsi Nazirliyində ölkəmizdə səfərdə olan Tacikistan Respublikasının əmək, miqrasiya və məşğulluq nazirinin müavini Kiyomiddin Davlatzodanın başçılıq etdiyi nümayəndə heyəti ilə görüş olub.

Görüş ölkəmizin əmək və məşğulluq təcrübəsini öyrənərək tətbiq etməkdə maraqlı olan Tacikistan nümayəndə heyəti ilə bu sahədə təcrübə mübadiləsi aparılması məqsədi daşıyıb.

Tacikistan nümayəndələrinə Dövlət Əmək Müfəttişliyi Xidmətinin fəaliyyəti, ölkəmizin sosial sahədə elektron xidmətlər təcrübəsi, həmçinin “Əmək və Məşğulluq” altsisteminin (ƏMAS) funksional imkanları  barədə təqdimatlar edilərək, ətraflı məlumatlar verilib.

Qonaqlara Nazirliyin 159 xidmətindən 140-dan və ya 92 faizdən çoxunun elektronlaşdırıldığı, e-sistem üzərindən 50-dən çox proaktiv xidmətin fəaliyyət göstərdiyi bildirilib. ƏMAS-ın innovativ üstünlükləri və funksiyaları, bu rəqəmsal sosial layihənin artıq bir neçə ildir ki, beynəlxalq nailiyyətlər əldə etdiyi, son olaraq ƏMAS-ın Beynəlxalq Telekommunikasiya İttifaqının “Çempion layihə” mükafatına layiq görüldüyü diqqətə çatdırılıb. ƏMAS-ın BMT-nin Cənub-Cənub əməkdaşlığı platformasında da uğurlu innovativ həll nümunəsi kimi təqdim edildiyi qeyd olunub.

Görüşdə qurumlar arasında əməkdaşlıq perspektivləri müzakirə edilib.