Türkiyənin ÇASGEM qurumu əməyin mühafizəsinə dair təlimlərə başlayıb

Türkiyə Respublikasının Əmək və Sosial Müdafiə Nazirliyinin tabeliyində fəaliyyət göstərən Əmək və Sosial Təminat Təlim və Tədqiqat Mərkəzi (ÇASGEM) tərəfindən Əmək və Əhalinin Sosial Müdafiəsi Nazirliyinin, Nazirlik yanında Dövlət Əmək Müfəttişliyi Xidmətinin və Xidmətin tabeliyindəki Əməyin Mühafizəsi Mərkəzinin əməkdaşları üçün “Əməyin təhlükəsizliyi və gigiyenası” mövzusunda təlimlərə start verilib.

5 saylı DOST Mərkəzində təşkil olunan ilk təlimdə ÇASGEM-in ekspertləri Esra Karaman və Derya Koçak tərəfindən əməyin mühafizəsinə dair proqram təqdim edilib. Təlim iştirakçıları əməyin mühafizəsi, təhlükəsizlik, risklərin qiymətləndirilməsi, iş gigiyenası və peşə sağlamlığı üzrə müasir yanaşmalar və beynəlxalq standartlarla bağlı bilik və bacarıqlar əldə ediblər.

Proqram çərçivəsində iştirakçılara əməyin mühafizəsi idarəetməsi və ISO 45001 standartları, iş mühitinə nəzarət və risklərin qiymətləndirilməsi, peşə sağlamlığı və sağlamlıq nəzarəti, iş gigiyenası, yanğın təhlükəsizliyi və fövqəladə hallar, eləcə də təzyiqli qablarda təhlükəsizlik üzrə əsas nəzəri və praktiki biliklər təqdim olunub.

Beş gün ərzində keçirilməsi planlaşdırılan təlimlər Beynəlxalq Əmək Təşkilatının 155 və 187 nömrəli Konvensiyalarının tələbləri çərçivəsində həyata keçirilir. Təlimlərin əsas məqsədi əməyin mühafizəsi sahəsində peşəkar biliklərin artırılması, təhlükəsizlik mədəniyyətinin gücləndirilməsi və beynəlxalq təcrübənin tətbiqinin genişləndirilməsinə töhfə verməkdir.