Türkiyənin ÇASGEM qurumu tərəfindən əməyin mühafizəsinə dair təlimlər uğurla yekunlaşıb

Əmək və Əhalinin Sosial Müdafiəsi Nazirliyinin, Nazirlik yanında Dövlət Əmək Müfəttişliyi Xidmətinin, həmçinin Xidmətin tabeliyində fəaliyyət göstərən Əməyin Mühafizəsi Mərkəzinin əməkdaşları üçün Türkiyə Respublikasının Əmək və Sosial Müdafiə Nazirliyinin tabeliyində fəaliyyət göstərən Əmək və Sosial Təminat Təlim və Tədqiqat Mərkəzi (ÇASGEM) tərəfindən “Əməyin təhlükəsizliyi və gigiyenası” mövzusunda təlimlər keçirilib.

Beş gün davam edən təlimlərin sonunda iştirakçılar üç komanda üzrə qrup işlərini təqdim ediblər. Sonda təlim iştirakçılarına ÇASGEM-in sədr müavini Ömər Faruk Öztürk tərəfindən müvafiq sertifikatlar təqdim olunub.

Qeyd edə ki, təlim proqramı ÇASGEM-in ekspertləri Esra Karaman və Derya Koçak tərəfindən aparılıb. Proqram çərçivəsində iştirakçılar əməyin mühafizəsi, iş təhlükəsizliyi, risklərin qiymətləndirilməsi, peşə sağlamlığı və iş gigiyenası sahələrində müasir yanaşmalar, beynəlxalq təcrübə və standartlar üzrə bilik və bacarıqlar əldə ediblər.

Təlimlər zamanı əməyin mühafizəsi idarəetmə sistemi və ISO 45001 standartları, iş mühitinə nəzarət və risklərin qiymətləndirilməsi, peşə sağlamlığı və sağlamlıq nəzarəti, iş gigiyenası, yanğın təhlükəsizliyi və fövqəladə hallar, eləcə də təzyiqli qablarda təhlükəsizlik mövzuları üzrə nəzəri və praktiki sessiyalar təqdim olunub.

Proqram Beynəlxalq Əmək Təşkilatının 155 və 187 nömrəli Konvensiyalarının tələblərinə uyğun şəkildə həyata keçirilib. Təlimlərin əsas məqsədi əməyin mühafizəsi sahəsində peşəkar biliklərin artırılması, təhlükəsizlik mədəniyyətinin gücləndirilməsi və beynəlxalq təcrübənin tətbiqinin genişləndirilməsinə töhfə vermək olub.