Uşaqların əmək hüquqlarının qorunması mövzusunda maarifləndirici tədbirlər davam edir

Şəki şəhər 5 nömrəli tam orta məktəbdə və Oğuz şəhər 2 nömrəli internat tipli texniki və təbiət təmayüllü liseydə uşaqların əmək hüquqlarının qorunması və qeyri-formal məşğulluğa qarşı mübarizə mövzusunda maarifləndirici tədbirlər keçirilib.

Tədbirlər “Uşaq Hüquqları Aylığı” çərçivəsində təşkil olunub. Görüşlərdə Dövlət Əmək Müfəttişliyi Xidmətinin Şəki–Zaqatala regional şöbəsinin əməkdaşları, eləcə də işəgötürənlər, məktəblərin pedaqoji kollektivi və şagirdlər iştirak ediblər.

Tədbirlərdə uşaq əməyinin istismarına qarşı mübarizənin əhəmiyyəti, uşaqların əmək hüquqlarının qorunması istiqamətində həyata keçirilən tədbirlər, həmçinin məcburi əmək və insan alverinin qarşısının alınması üçün birgə fəaliyyətin vacibliyi vurğulanıb.

Görüşlərdə, eyni zamanda, qeyri-formal məşğulluğun aradan qaldırılmasının sosial rifahın artırılması və əmək münasibətlərinin leqallaşdırılması baxımından əhəmiyyəti qeyd edilib.

Sonda iştirakçıların sualları cavablandırılıb və mövzu ətrafında fikir mübadiləsi aparılıb.